Gen 40 | NdeIBE | STEP | Ngesinye isikhathi samuva kwalokhu umphathinkezo lompheki wesinkwa, abenkosi yaseGibhithe bayizondisa inkosi yabo, inkosi yaseGibhithe.

Genesis 40

UJosefa Uchasisa Amaphupho

1 Ngesinye isikhathi samuva kwalokhu umphathinkezo lompheki wesinkwa, abenkosi yaseGibhithe bayizondisa inkosi yabo, inkosi yaseGibhithe. 2 UFaro wayezizondele izikhulu zakhe zombili, umphathinkezo omkhulu lompheki wezinkwa omkhulu, 3 wabaphosela entolongweni eyayisendlini kandunankulu wabalindi, kuyona leyontolongo uJosefa ayetokisiswe khona.

4 Undunankulu wabalindi wabaqhubela kuJosefa, wabalawula. Kwathi sebehlale entolongweni okwesikhathi esithile, 5 ngulowo wamadoda la amabili – umphathinkezo lompheki wesinkwa, abenkosi yaseGibhithe, ababetokisile – baphupha amaphupho ngabusuku bunye, kwathi yilelo iphupho laba lengcazelo yalo.

6 Kwathi uJosefa efika kubo ngakusasa ekuseni, wabona bebunile. 7 Wasezibuza izikhulu zikaFaro ezazisentolongweni kanye laye endlini yenkosi yakhe wathi, “Kungani ubuso benu bubunile kanje lamuhla na?”

8 Baphendula bathi, “Sobabili siphuphile, kodwa kakho ongasichasisela amaphupho ethu.” Yikho uJosefa wasesithi kubo, “Izingcazelo kasizikaNkulunkulu na? Ngitshelani amaphupho enu.”

9 Yikho umphathinkezo omkhulu wamtshela uJosefa ngephupho lakhe. Wathi kuye, “Ephutsheni lami ngibone isihlahla sevini siphambi kwami, 10 lelovini lilamagatsha amathathu. Lonela ukununkula lahle laqhakaza, amaxha alo ahle avuthwa aba yizithelo ezivuthiweyo. 11 Inkezo kaFaro ibisesandleni sami, ngawathatha amagilebisi ngawakhamela enkezweni kaFaro ngamqhubela esandleni sakhe.”

12 UJosefa wathi kuye, “Nanku elikutshoyo. Amagatsha amathathu yizinsuku ezintathu.

13 Phakathi kwezinsuku ezintathu uFaro uzaphakamisa ikhanda lakho akubuyisele esikhundleni sakho, njalo uzayibeka inkezo kaFaro esandleni sakhe njengalokhu owawuvele ukwenza usesengumphathinkezo yakhe.

14 Kodwa nxa konke sekulungile ungikhumbule, ungivezele umusa; ungikhulumele kuFaro ukuze ngiphume kule intolongo. 15 Ngoba ngasuswa ngamandla elizweni lamaHebheru, futhi lapha kangenzanga lutho olufanele ukuthi ngifakwe entolongweni.”

16 Kwathi umpheki wezinkwa omkhulu ebona ukuthi uJosefa wayenike ingcazelo emnandi, wathi kuJosefa, “Lami njalo ngiphuphile: Phezu kwekhanda lami bekulezitsha zesinkwa ezintathu. 17 Esitsheni esiphezulu bekulemihlobo yonke yalokho okubhakelwe uFaro, kodwa izinyoni zazilokhu zitshobola esitsheni sisekhanda lami.”

18 UJosefa wathi, “Nanku elikutshoyo. Izitsha ezintathu ziyinsuku ezintathu. 19 Phakathi kwezinsuku ezintathu uFaro uzaliphakamisa ikhanda lakho akulengise esihlahleni. Izinyoni zizakudla inyama yakho.”

20 Ilanga lesithathu laliyisikhumbuzo sokuzalwa kukaFaro, yikho wenzela izikhulu zakhe idili. Waphakamisa amakhanda elikamphathinkezo omkhulu lelikampheki wezinkwa omkhulu phambi kwezikhulu zakhe:

21 Wabuyisela umphathinkezo esikhundleni sakhe, waphinda njalo ukubeka inkezo esandleni sikaFaro, 22 kodwa walengisa umpheki wezinkwa omkhulu, kwaba njengoba uJosefa wayetshilo kubo ekubachasiseleni kwakhe.

23 Kodwa umphathinkezo omkhulu kasamkhumbulanga uJosefa; wakhohlwa ngaye.